Avstraliya futbol federasiyasi milliy terma jamoa 2026 yilgi Jahon chempionatini tark etganidan so‘ng, bosh murabbiy Toni Popovichni qo‘llab-quvvatlashini ma’lum qildi. 1/16 final uchrashuvida Avstraliya Misr terma jamoasiga 1:1 (penaltilar seriyasida 2:4) hisobida imkoniyatni boy berib, turnirdagi ishtirokini yakunlagan edi.

«Biz, albatta, natijadan mamnunmiz, lekin bizda har doim bundan-da yaxshiroq bo‘lish uchun salohiyat bor. Nimalar qildik, nimalar qilishimiz kerak edi, yana nimalar qilish mumkin edi — turli xil yechimlar ustida bosh qotiryapmiz. Biroq bir narsani aniq aytish mumkin: taxminan bir yarim yil oldin Toni Popovichni murabbiylik postiga taklif qilganimizdan faxrlanamiz. U milliy terma jamoalarimiz standartlarini nafaqat maydonda, balki undan tashqarida ham elita darajasiga olib chiqdi.

Jahon chempionati boshlanishiga bir kun qolganida Toni Popovich bilan shartnomani uzaytirdik, chunki biz o‘ziga xos vaziyatda qolgan edik: keyingi yirik turnir — Osiyo Kubogiga bor-yo‘g‘i yarim yil vaqt qoldi. O‘yinchilar va murabbiylar shtabi uchun barqarorlik juda muhim va men ushbu qaror jamoaning Osiyo Kubogi arafasida o‘sishga erishishiga yordam berishiga aminman», — deya Avstraliya futbol federasiyasi direktori Martin Kugelerning so‘zlarini keltiradi ESPN nashri.