Meksika terma jamoasi futbolchilari bloger Stevewilldoit tomonidan sovg‘a qilingan qimmatbaho Rolex soatlarini qabul qilishdan bosh tortdi. Bu haqda The Athletic xabar berdi.
Ma’lum qilinishicha, JCH-2026 1/16 finalida Ekvadorga qarshi (2:0) o‘yindan oldin bloger meksikaliklar yig‘iniga tashrif buyurgan. U futbolchilarga narxi 30 mingdan 90 ming AQSH dollarigacha bo‘lgan Rolex soatlarini sovg‘a qilgan. Sovg‘alarning umumiy qiymati taxminan 1 million dollarga teng bo‘lgan.
Stevewilldoit bu sovg‘ani o‘zi avval Meksikada yashaganligi, shuningdek, terma jamoaning 1/8 finalga chiqishiga 2 million dollar tikkani sababli taqdim etganini aytgan.
Biroq Meksika terma jamoasi futbolchilari soatlarni qaytarishga qaror qildi.
FIFA qoidalariga ko‘ra, futbolchilar o‘yin natijasiga ta’sir ko‘rsatishi mumkin bo‘lgan qimmatbaho sovg‘alarni qabul qila olmaydi. Mazkur talabni buzganlarga jarima solinishi, shuningdek, ikki yilgacha futboldan chetlatish jazosi qo‘llanilishi mumkin.
