Argentina terma jamoasi jahon chempionatining 1/8 final bosqichida Misrga qarshi maydonga tushadi. Uchrashuv bugun bo‘lib o‘tadi, bahsning boshlanish hushtagi Toshkent vaqti bilan soat 21:00 da chalinadi.

O‘yin oldidan «albiseleste» ustozi Lionel Skaloni jurnalistlar bilan o‘z fikrlarini o‘rtoqlashdi.

«Biz futbolchilar bilan Misr terma jamoasi haqida bir nechta suhbatlar o‘tkazdik. Gap ushbu jamoaga qanday qarshilik ko‘rsatish haqida bordi. Biz o‘zimizni yangi tomonlama ko‘rsatishimizga to‘g‘ri keladi, chunki bu boshqacha raqib, ammo o‘z prinsiplarimizdan voz kecha olmasligimizni ham bilamiz. O‘zligimizcha qolishimiz kerak.

Vazifamiz — raqibning qarshi hujumlaridan qochish va o‘tgan o‘yindagi ssenariy takrorlanishiga yo‘l qo‘ymaslikdir. Kabo-Verde terma jamoasi tezkor hujumlarda bizga juda ko‘p muammo tug‘dirdi. Biz to‘pga egalik qilgan holda himoyalanishni afzal ko‘ramiz va bundan keyin ham aynan shunday yo‘l tutishni rejalashtiryapmiz», — deya Skalonining so‘zlaridan iqtibos keltiradi AlbicelesteTalk.

Eslatib o‘tamiz, Argentina qo‘shimcha bo‘limlarda Kabo-Verdeni 3:2 hisobida mag‘lub etgan edi. G‘alaba goli 111-daqiqada kiritilgan.