«Xoffenxaym» bosh direktori Andreas Shiker klub hujumchi Fisnik Asllanining kelajagi bo‘yicha muzokaralar olib borilayotganini ma’lum qildi. 23 yoshli futbolchi Bundesligadagi muvaffaqiyatli mavsumdan so‘ng top-klublar e’tiborini tortdi.

«Vaziyat shundan iboratki, hozir ham mamlakat ichida, ham xorijdagi klublar bilan muzokaralar o‘tkazilmoqda. Shuningdek, Asllanining shartnomasida uni sotib olish bandi borligi ham sir emas», — dedi Shiker Kicker nashriga bergan intervyusida.

Avvalroq mish-mishlarda Asllani Dortmundning «Borussiya»si, «Barselona», «Chelsi» va «Tottenxem» bilan bog‘langan edi. Asllani Bundesliganing 33 ta uchrashuvida 10 ta gol urib, 9 ta golli uzatmani amalga oshirgan holda o‘zi uchun sermahsul mavsumni o‘tkazdi.