«Хоффенхайм» бош директори Андреас Шикер клуб ҳужумчи Фисник Аслланининг келажаги бўйича музокаралар олиб борилаётганини маълум қилди. 23 ёшли футболчи Бундеслигадаги муваффақиятли мавсумдан сўнг топ-клублар эътиборини тортди.

«Вазият шундан иборатки, ҳозир ҳам мамлакат ичида, ҳам хориждаги клублар билан музокаралар ўтказилмоқда. Шунингдек, Аслланининг шартномасида уни сотиб олиш банди борлиги ҳам сир эмас», — деди Шикер Kicker нашрига берган интервьюсида.

Аввалроқ миш-мишларда Асллани Дортмунднинг «Боруссия»си, «Барселона», «Челси» ва «Тоттенхэм» билан боғланган эди. Асллани Бундеслиганинг 33 та учрашувида 10 та гол уриб, 9 та голли узатмани амалга оширган ҳолда ўзи учун сермаҳсул мавсумни ўтказди.