Kataloniyaning "Barselona" klubi "Atletiko Madrid" rahbariyatining rad javoblariga qaramay, argentinalik hujumchi Xulian Alvaresni qo‘lga kiritishga ishonmoqda.
SPORT nashrining xabar berishicha, "kataloniyaliklar" Madrid klubi bosh ijrochi direktori Migel Anxel Xil Marinning futbolchi sotilmasligi haqidagi bayonotlarini yakuniy qaror emas, balki muzokaralar strategiyasining bir qismi sifatida baholamoqda.
Klub sport direktori Deku va bosh murabbiy Xansi Flik 26 yoshli hujumchini Robert Levandovskining o‘rniga eng munosib nomzod deb hisoblamoqda va ushbu transferni ustuvor vazifa sifatida ko‘rmoqda. Xansi Flik argentinalik futbolchi Lamin Yamal bilan birgalikda jamoaning uzoq muddatli asosiy hujumchisiga aylanishi mumkinligiga ishonchi komil.
Qayd etilishicha, "Barselona" futbolchi uchun kimoshdi savdosiga kirishmoqchi emas, biroq vaziyat o‘zgarsa, yaxshilangan taklif bilan chiqishi mumkin. Shuningdek, transferning amalga oshishida Alvaresning o‘zi Madrid klubini tark etish istagini bildirishi hal qiluvchi rol o‘ynashi kutilmoqda.
