«Nyukasl» yarim himoyachisi Brunu Gimaraes faoliyatini «Arsenal»da davom ettirishni istamoqda. The Sun xabariga ko‘ra, braziliyalik futbolchi klubni tark etish istagini «hakkalar» rahbariyatiga ma’lum qilgan, shundan so‘ng londonliklar uning transferi bo‘yicha to‘g‘ridan-to‘g‘ri muzokaralarni boshlashgan.

Bungacha tomonlar vositachilar orqali aloqada bo‘lib turishgan edi, chunki «Nyukasl» o‘z yetakchi futbolchilaridan birini sotishni rejalashtirmagandi. «Arsenal» 28 yoshli xavbek uchun 70 million yevro atrofida taklif qilishga tayyor, «hakkalar» esa bundan kattaroq summa olishni ko‘zlamoqda.

«Arsenal» Morgan Rojers uchun kurashda «Chelsi»ga imkoniyatni boy berganidan so‘ng, Gimaraesga bo‘lgan qiziqish yanada ortdi.

Gimaraes 2022 yildan beri «Nyukasl» sharafini himoya qilib kelmoqda. O‘tgan mavsumda u 41 ta o‘yinda maydonga tushib, 9 ta gol urdi va 8 ta golli uzatmaga mualliflik qildi.