«Ньюкасл» ярим ҳимоячиси Бруну Гимараэс фаолиятини «Арсенал»да давом эттиришни истамоқда. The Sun хабарига кўра, бразилиялик футболчи клубни тарк этиш истагини «ҳаккалар» раҳбариятига маълум қилган, шундан сўнг лондонликлар унинг трансфери бўйича тўғридан-тўғри музокараларни бошлашган.

Бунгача томонлар воситачилар орқали алоқада бўлиб туришган эди, чунки «Ньюкасл» ўз етакчи футболчиларидан бирини сотишни режалаштирмаганди. «Арсенал» 28 ёшли хавбек учун 70 миллион евро атрофида таклиф қилишга тайёр, «ҳаккалар» эса бундан каттароқ сумма олишни кўзламоқда.

«Арсенал» Морган Рожерс учун курашда «Челси»га имкониятни бой берганидан сўнг, Гимараэсга бўлган қизиқиш янада ортди.

Гимараэс 2022 йилдан бери «Ньюкасл» шарафини ҳимоя қилиб келмоқда. Ўтган мавсумда у 41 та ўйинда майдонга тушиб, 9 та гол урди ва 8 та голли узатмага муаллифлик қилди.