«Barselona» Dortmundning «Borussiya» klubi vingeri Karim Adeyemi bilan shartnoma imzolanganini tez orada e’lon qiladi.

24 yoshli futbolchi bugun «ko‘k-anorranglilar»ning yangi o‘yinchisi sifatida tanishtiriladi, bu haqda klub prezidenti Joan Laporta ma’lum qildi. Insayder Fabrisio Romanoning ma’lumotlariga ko‘ra, futbolchining o‘zi aynan «Barselona»ga o‘tishni qat’iy talab qilgan.

«Men Angliyaga borishni xohlamayman, meni boshqa klublar ham, «Borussiya» bilan yangi shartnoma ham qiziqtirmaydi. Mening orzum — «Barsa». «Barsa»ga o‘tishimni hal qil», — deya Adeyemining agenti Jorje Mendeshga aytgan so‘zlarini keltiradi insayder.

Germaniyalik futbolchi «arilar» safida jami 146 ta o‘yin o‘tkazib, o‘z hisobiga 36 ta gol va 25 ta golli uzatma yozib qo‘ygan.