«Manchester Yunayted» 15 yoshli vinger Jey-Jey Gabrielni «Rusenborg»ga qarshi o‘rtoqlik o‘yini qaydnomasiga kiritdi. Yosh futbolchi Maykl Karrik boshchiligidagi asosiy jamoa bilan birga Norvegiyaga yo‘l oldi.
O‘tgan mavsum yakunlariga ko‘ra, Gabriel Angliyaning yuniorlar o‘rtasidagi chempionatida eng yaxshi futbolchi hamda «Manchester Yunayted» akademiyasining 18 yoshgacha bo‘lgan toifasidagi eng yaxshi o‘yinchisi sovrinlarini qo‘lga kiritdi. Futbolchi barcha musobaqalarda maydonga tushgan 32 ta o‘yinda 29 ta gol urishga erishdi.
Agar futbolchi «Rusenborg»ga qarshi o‘yinda maydonga tushsa, u «Manchester Yunayted» tarixidagi eng yosh o‘yinchilardan biriga aylanishi mumkin. Klub rekordi 16 yoshu 19 kunligida debyut qilgan Devid Gaskellga tegishli.
