Madridning «Atletiko» klubi angliyalik vinger Jeydon Sanchoni transfer qilishga qiziqish bildirmoqda. Bild nashrining xabar berishicha, Ispaniya klubi vaziyatni diqqat bilan kuzatib bormoqda va angliyalik futbolchini hujum chizig‘ini kuchaytirish uchun potensial nomzod sifatida ko‘rib chiqmoqda, ammo hozircha o‘yinchining agentlariga rasmiy taklif bilan chiqqani yo‘q.

Iyul oyi boshida «Manchester Yunayted» bilan shartnomasi yakunlangach, Sancho erkin agent maqomida bo‘lib turibdi va yangi klub bilan tovon pulisiz shartnoma imzolashi mumkin. 26 yoshli futbolchini ortga qaytarishga Dortmundning «Borussiya» klubi ham qiziqmoqda.

Germaniyaliklar Sancho agar maoshining sezilarli darajada kamayishiga rozi bo‘lsa, u bilan shartnoma tuzishga tayyor. Uning asosiy maoshi taxminan 5 million yevroni tashkil etishi kutilmoqda. Bundan tashqari, «Borussiya» ko‘proq natijalarga bog‘liq bo‘lgan kontrakt taklif qilmoqchi. Angliyalik futbolchi tekinga tushishiga qaramay, klub rahbariyati unga imzo bonusi to‘lashga tayyor emas.