«Liverpul» «Pari Sen-Jermen» himoyachisi Ilya Zabarniyning transferi bo‘yicha dastlabki muzokaralarni o‘tkazdi. Bu haqda X ijtimoiy tarmog‘idagi DaveOCKOP insayderlik akkaunti xabar bermoqda.

Manbaning xabariga ko‘ra, mersisaydliklarning futbolchiga qiziqish bildirayotganidan xabar topgan himoyachining vakillari «Liverpul» bilan o‘zlari bog‘lanishgan. Qayd etilishicha, hozircha o‘zaro kelishuvga erishilmagan, biroq muzokaralar davom etmoqda. Parijliklar Zabarniy uchun 63 million yevro to‘lashgani va shu sababli shu yozda uni arzonroq narxda sotishga rozi bo‘lishlari ehtimoldan yiroq ekani ta’kidlanmoqda.

Ilya Zabarniy «PSJ» safini 2025 yilning yozida to‘ldirgan edi. U jamoa tarkibida 37 ta o‘yinda maydonga tushib, 1 ta gol urgan. Transfermarkt portali ma’lumotlariga ko‘ra, 23 yoshli futbolchining bozor qiymati 40 million yevroni tashkil etadi. Uning klub bilan amaldagi shartnomasi 2030 yilning yozigacha mo‘ljallangan.