Portugaliya terma jamoasining 27 yoshli futbolchisi ushbu yozda jamoasini o‘zgartirish istagini oshkora ma’lum qilgan edi. Oxirgi vaqtlarda «Galatasaray» hujumchiga jiddiy qiziqish bildirayotgandi.

Biroq Sportitalia jurnalisti Janluiji Longarining xabar berishicha, «rossoneri» so‘ralayotgan 60 million yevro miqdoridagi summani kamaytirmoqchi emas. Ushbu holat turklar bilan muzokaralarni murakkablashtirib, jarayonning boshi berk ko‘chaga kirib qolishiga olib keldi.

Hozirgi vaqtda Leau «Milan»da qolishga moyil bo‘lib turibdi, ammo 2028 yilning yozigacha mo‘ljallangan amaldagi shartnomani uzaytirmaslik sharti bilan.

2025/26 yilgi mavsumda Rafael A Seriyada 29 ta o‘yinda maydonga tushib, 9 ta gol urdi, 3 ta golli uzatma berdi va 5 ta sariq kartochka oldi. CHM-2026da esa Leau 5 ta o‘yinda 1 ta gol va 1 ta golli uzatmani o‘z hisobiga yozdirib qo‘ygan.