«Fulxem» bosh murabbiyi Alvaro Arbeloa «Malaga»ga qarshi o‘rtoqlik uchrashuvining final hushtagidan so‘ng qizil kartochka oldi.

«La Rosaleda» stadionida o‘tkazilgan bahs 2:2 hisobida yakunlandi. Reglamentga ko‘ra, durang qayd etilgan taqdirda g‘olib penaltilar seriyasi orqali aniqlanishi kerak edi. Biroq «Real»ning sobiq murabbiyi Arbeloa chetlatilganidan keyin Angliya klubi penaltilar seriyasida ishtirok etishdan bosh tortdi. Natijada «Malaga» Kubok Kosta-del-Sol g‘olibi deb e’lon qilindi.

90-daqiqada «Malaga» hujumchisi Eneko Xauregi qo‘l bilan o‘ynash uchun belgilangan penaltini aniq amalga oshirib, hisobni tenglashtirdi. Hakamning bu qarori Arbeloaning noroziligiga sabab bo‘ldi. Asosiy vaqt yakunlanganidan so‘ng 43 yoshli murabbiy maydonga chiqib, hakam bilan tortisha boshladi.

Shundan so‘ng arbitr Arbeloaga qizil kartochka ko‘rsatdi, «Fulxem» futbolchilari esa maydonni tark etdi.

Keyinroq «Malaga»ning ma’lum qilishicha, «Fulxem» vakillari penaltilar seriyasi o‘rtoqlik uchrashuvi bo‘yicha tuzilgan shartnomada ko‘zda tutilmaganini aytgan. Shuningdek, London klubi penaltilar seriyasida ishtirok etish jamoaning Ispaniyadan rejalashtirilgan parvoziga ulgurmasligiga sabab bo‘lishini bildirgan.