«Manchester Siti»ning braziliyalik vingeri Savio yaqin vaqt ichida Londonning «Tottenxem» klubiga o‘tishi mumkin. Bu haqda insayder Nikolo Skira xabar berdi.

Manba ma’lumotiga ko‘ra, «shporlar» 22 yoshli futbolchi bilan 2032 yilgacha mo‘ljallangan shaxsiy shartnoma borasida kelishuvga erishgan. Savioning o‘zi ham «Tottenxem»ga o‘tishni juda istamoqda va transfer imkon qadar tezroq amalga oshishini xohlamoqda.

Qayd etilishicha, futbolchi bilan muzokaralarda «Tottenxem» bosh murabbiyi Roberto De Dzerbi muhim rol o‘ynagan. Mutaxassis Savioni London klubi loyihasiga ishontirishga muvaffaq bo‘lgan.

Savio o‘tgan mavsumda «Manchester Siti» safida barcha musobaqalar doirasida 36 ta uchrashuvda maydonga tushib, 4 ta gol urdi va 3 ta golli uzatmani amalga oshirdi.