Kamerun ayollar milliy jamoasi tarixda ilk bor Afrika millatlar kubogi g‘olibiga aylandi.

Marokash poytaxti Rabotda o‘tkazilgan finalda kamerunlik futbolchilar turnir debyutanti Malavini 3:0 hisobida mag‘lub etdi. Mari Nga Manga ikkita gol urgan bo‘lsa, yana bir to‘p Naomi Eto hisobiga yozildi.

Kamerunliklar Malavining asosiy hujum kuchlari — Tabita va Temva Chavinga opa-singillarini to‘xtatishga muvaffaq bo‘lib, finalda o‘z darvozasi daxlsizligini saqlab qoldi.

Bu Kamerunning Afrika millatlar kubogi finalidagi to‘rtinchi ishtiroki edi. Jamoa avvalgi uchta hal qiluvchi o‘yinda mag‘lubiyatga uchragan, ammo bu safar tarixiy sovrinni qo‘lga kiritdi.

Kamerun futbol federasiyasi prezidenti Samyuel Eto’O g‘alabadan so‘ng quvonchini yashira olmadi. Sobiq futbolchi maydonda jamoa a’zolari bilan birga chempionlikni nishonlab, o‘yinchilarni tarixiy natija bilan tabrikladi.

Kamerun pley-offda Nigeriyani 1:0 hisobida mag‘lub etdi, yarimfinalda esa mezbon Marokashni penaltilar seriyasida turnirdan chiqardi. Malavi ham musobaqada ilk bor ishtirok etishiga qaramay, finalgacha yetib borib, o‘z futboli tarixidagi eng yaxshi natijani qayd etdi.