Abbosbek Fayzullayev faoliyatini Fransiya chempionatida davom ettirishi mumkin. «Strasburg» o‘zbekistonlik futbolchini tarkibiga qo‘shib olish imkoniyatini o‘rganishga kirishgan.

«Radio L» tarqatgan ma’lumotga ko‘ra, fransuz klubi 21 yoshli futbolchining atrofidagi shaxslar bilan aloqa o‘rnatgan va ehtimoliy kelishuv yuzasidan ilk muloqotlar o‘tkazilgan.

Fayzullayevning o‘zi ham Fransiyaga ko‘chib o‘tish va «Strasburg» loyihasining bir qismiga aylanish imkoniyatiga qiziqish bildirgani aytilmoqda. Bu esa muzokaralarni davom ettirish uchun tomonlarda o‘zaro qiziqish mavjudligini ko‘rsatadi.

Hozircha «Istanbul Bashakshehir» bilan qanday moliyaviy shartlar muhokama qilinishi, transfer summasi yoki ehtimoliy shartnoma muddati haqida ma’lumot berilmagan.

Shu tariqa, O‘zbekiston milliy jamoasi a’zosi uchun Fransiya chempionati varianti paydo bo‘lgan, ammo muzokaralar hali dastlabki bosqichda.