«Torino» «Fiorentina»ning chap qanot himoyachisi Nikkolo Fortini transferi bo‘yicha kelishuvga erishdi. Bu haqda insayder Fabrisio Romano xabar berdi. Boshqa manbalar ham futbolchining «Torino»ni tanlaganini tasdiqlamoqda.

Klublar o‘rtasidagi navbatdagi muzokaralardan so‘ng yangi kelishuvga erishilgan. 20 yoshli italiyalik himoyachiga Angliya klublari, xususan «Xall Siti» ham qiziqish bildirgan, ammo futbolchi faoliyatini Turinda davom ettirishni ma’qul ko‘rgan.

Fortini «Torino» safiga ijara asosida qo‘shiladi. Kelishuvda futbolchini keyinchalik to‘liq sotib olish huquqi ham ko‘zda tutilgan. «Fiorentina» transferni amalga oshirishga rozilik bergan.

Endi tomonlar transfer bilan bog‘liq zarur rasmiyatchiliklarni yakunlashi kerak. Shundan so‘ng Fortinining «Torino»ga o‘tishi rasman e’lon qilinishi kutilmoqda.

O‘tgan mavsumda Fortini «Fiorentina» safida barcha musobaqalar doirasida 26 ta uchrashuvda maydonga tushdi.