Londonning "Arsenal" klubi hujumchisi Viktor Dyokereshning "Barselona"ga o‘tishi mumkinligi haqidagi xabarlar tarqalishda davom etmoqda.

Shvesiyalik futbolchi Xulian Alvares transferi amalga oshmay qolganidan so‘ng "ko‘k-anorranglilar" hujum chizig‘ini kuchaytirish uchun ko‘rib chiqayotgan variantlardan biri hisoblanmoqda.

Jurnalist Jerar Romero ma’lumotiga ko‘ra, 28 yoshli futbolchining agenti so‘nggi ikki-uch kunni Barselonada o‘tkazgan. Bu holat "Arsenal" hujumchisining Kataloniyaga ko‘chib o‘tishi mumkinligi haqidagi mish-mishlarni yanada kuchaytirdi.

Shu bilan birga, boshqa manbalarda hozircha "Barselona" va "Arsenal" o‘rtasida Dyokeresh transferi bo‘yicha rasmiy muzokaralar boshlanmagani aytilmoqda.

"Barselona"ga, shuningdek, "Inter" sardori Lautaro Martinesga qiziqish bildirilayotgani haqida xabarlar bor. Argentinalik hujumchi ham Kataloniya klubining variantlari qatorida tilga olinmoqda.

Transfermarkt portalida Viktor Dyokereshning transfer qiymati 65 million yevro atrofida baholanmoqda.