"Barselona"ning o‘ng qanot himoyachisi Ektor Fort Dortmundning "Borussiya" klubi va "Real Sosyedad"ning transfer maqsadlari qatorida qolmoqda. "Borussiya" futbolchiga jiddiy qiziqish bildirmoqda.

Jurnalist Jerar Romero ma’lumotiga ko‘ra, Fort uchun kurashda Dortmund klubi asosiy da’vogar hisoblanadi. Biroq nemis klubi 20 yoshli futbolchini sotib olishdan avval hozirgi tarkibdagi bir nechta o‘yinchi bilan xayrlashishi kerak.

"Real Sosyedad"da esa vaziyat yanada murakkab. Basklar hozircha "Barselona" talab qilayotgan transfer mablag‘ini ham, futbolchining maosh borasidagi talablarini ham qondirish imkoniga ega emas. Fort "Real Sosyedad" himoya chizig‘ini kuchaytirish uchun ko‘rib chiqilayotgan nomzodlardan biri ekani ham xabar qilingan.

Avvalroq "Barselona" o‘z tarbiyalanuvchisining transferidan taxminan 20 million yevro ishlab olishni rejalashtirayotgani ma’lum bo‘lgan. Ayrim xabarlarga ko‘ra, kataloniyaliklar keyingi sotuvdan katta foiz olish sharti bilan narxni pasaytirishga ham tayyor.

Fort o‘tgan mavsumni "Elche"da ijara asosida o‘tkazdi.