«Aston Villa» hujumchisi Olli Uotkins faoliyatini Saudiya Arabistonining «Al-Hilol» klubida davom ettirish istagini bildirdi.

The Athletic ma’lumotiga ko‘ra, angliyalik forvard Birmingem klubi rahbariyatini ketish istagidan xabardor qilgan. «Al-Hilol» futbolchi uchun navbatdagi taklifini yuborgan, biroq «Aston Villa» uni ham rad etgan. So‘nggi xabarlarda klub Uotkins bo‘yicha munosib taklif tushsa, uning ketishiga ruxsat berishi mumkinligi aytilmoqda.

Uotkins 2020 yildan buyon «Aston Villa» sharafini himoya qilib keladi. U jamoaga «Brentford»dan kelib qo‘shilgan. Hujumchi Birmingem klubi safida barcha musobaqalarda 278 ta uchrashuv o‘tkazib, 108 ta gol urgan va 47 ta golli uzatmani amalga oshirgan.

Uning «Aston Villa» bilan amaldagi shartnomasi 2028 yil yoziga qadar mo‘ljallangan.