«Manchester Yunayted» afsonasi Ueyn Runi Angliya Premyer-ligasining yangi mavsumi 1-turida «Xall Siti»dan 0:2 hisobida uchralgan mag‘lubiyatdan so‘ng jamoa o‘yinini tanqid qildi.

Runi, ayniqsa, «MYU» o‘tkazib yuborgan ikkinchi golda Lyuk Shouning harakatlariga e’tibor qaratdi.

«Bu Lyuk Shou tomonidan himoyada yo‘l qo‘yilgan bolalarcha xato. «Xall» bunday vaziyatni kutgan bo‘lsa kerak. Shou himoya chizig‘idan taxminan to‘rt metr ortga chekindi. Bunday aniq uzatmadan keyin hujumni to‘xtatishning deyarli iloji yo‘q», — dedi Runi BBC efirida.

«Manchester Yunayted»ning sobiq hujumchisi jamoaning harakatlarida shiddat yetishmaganini ham ta’kidladi.

«Jamoaga pressingda va to‘pni qaytarib olishga urinishlarda ancha ko‘proq energiya kerak. Ular juda passiv harakat qilishdi», — dedi Runi.

Shuningdek, u jamoa sardori Brunu Fernandeshning o‘yindan keyingi fikrlariga munosabat bildirdi.

«Brununing «Manchester Yunayted» safar o‘yinlarida bir xil xatolarni takrorlayotgani haqidagi gapi g‘alati eshitildi. Hozir klub o‘tgan mavsumda erishgan natijalarini yanada rivojlantirishi kerak. Maykl Kerrik kelganidan so‘ng jamoa APLda uchinchi o‘rinni egalladi va Chempionlar ligasi yo‘llanmasini qo‘lga kiritdi», — dedi Runi.

«Manchester Yunayted» APLning 2-turida 30 avgust kuni «Ipsvich»ga qarshi maydonga tushadi.