FIFA prezidenti Janni Infantino 2026 yildayoq o‘smirlar o‘rtasidagi U15 jahon chempionatini o‘tkazish rejalarini tasdiqladi. Musobaqada tashkilotga a’zo bo‘lgan barcha 211 ta milliy federasiya ishtirok etishi mumkin.

Yakshanba kuni FIFA tomonidan e’lon qilingan videoda Infantino bo‘lajak musobaqani "4000 dan ortiq bola birgalikda futbol o‘ynay oladigan o‘smirlar futboli bayrami" deb atadi.

Shuningdek, Infantino o‘ziga nisbatan bildirilayotgan tanqidlar haqida ham umumiy fikr bildirdi.

"So‘nggi bir necha haftada ko‘p narsalar sodir bo‘ldi va siz meni eshitishingiz, shuningdek, o‘z his-tuyg‘ularingizni bildirishingiz muhim. Umuman olganda, hammasi juda ijobiy. Men olayotgan barcha qo‘llab-quvvatlashlardan xursandman. Menga ayrim savollar ham berilmoqda. Ommaviy axborot vositalarida hozir tarqalayotgan xabarlarni hisobga olsak, bu savollar kutilgan edi. Muhimi, ularga to‘g‘ri javob berish imkoniyatiga ega bo‘lish va buni vijdonan pok holda amalga oshirish", — deya FIFA rahbarining so‘zlarini keltiradi L'Equipe.

Hozircha musobaqa formati va uning qayerda o‘tkazilishi haqida aniq ma’lumot yo‘q.