«Galatasaroy» «Shtutgart» markaziy hujumchisi Ermedin Demirovich transferi bo‘yicha taklifini oshirdi. Bu haqda insayder Nikolo Skira xabar berdi. So‘nggi ma’lumotlarga ko‘ra, yangi taklif 20 million yevro atrofida.

Avvalroq turk klubi 28 yoshli Bosniya va Gersegovina terma jamoasi futbolchisi uchun 18 million yevro taklif qilgani, «Shtutgart» esa hujumchini 20–25 million yevroga baholayotgani xabar qilingandi.

Qayd etilishicha, Demirovich «Galatasaroy» bilan shaxsiy shartnoma borasida kelishuvga erishgan. Tomonlar 2030 yilgacha mo‘ljallangan shartnoma bo‘yicha kelishib olgan.

Ayni paytda «Galatasaroy» tarkibida Turkiya Superligasi o‘yinlari uchun yana faqat bitta xorijlik futbolchini ro‘yxatdan o‘tkazish imkoniyati qolgan.

«Shtutgart» Demirovichni 2024 yil yozida «Augsburg»dan 21 million yevro evaziga xarid qilgan. Hujumchi ikki yil davomida nemis klubi safida 87 ta o‘yinda 32 ta gol urib, 8 ta golli uzatmani amalga oshirgan.