«Галатасарой» «Штутгарт» марказий ҳужумчиси Эрмедин Демирович трансфери бўйича таклифини оширди. Бу ҳақда инсайдер Николо Скира хабар берди. Сўнгги маълумотларга кўра, янги таклиф 20 миллион евро атрофида.

Аввалроқ турк клуби 28 ёшли Босния ва Герцеговина терма жамоаси футболчиси учун 18 миллион евро таклиф қилгани, «Штутгарт» эса ҳужумчини 20–25 миллион еврога баҳолаётгани хабар қилинганди.

Қайд этилишича, Демирович «Галатасарой» билан шахсий шартнома борасида келишувга эришган. Томонлар 2030 йилгача мўлжалланган шартнома бўйича келишиб олган.

Айни пайтда «Галатасарой» таркибида Туркия Суперлигаси ўйинлари учун яна фақат битта хорижлик футболчини рўйхатдан ўтказиш имконияти қолган.

«Штутгарт» Демировични 2024 йил ёзида «Аугсбург»дан 21 миллион евро эвазига харид қилган. Ҳужумчи икки йил давомида немис клуби сафида 87 та ўйинда 32 та гол уриб, 8 та голли узатмани амалга оширган.