«Atletiko» Xulian Alvaresning «Barselona»ga ehtimoliy transferi bo‘yicha qat’iy pozisiyasini rasman ma’lum qildi. Klub direktorlar kengashi argentinalik hujumchining kataloniyaliklar safiga o‘tishi yuzasidan muzokara olib bormaslik qarorini bir ovozdan qo‘llab-quvvatladi.

«Atletiko» bayonotida klub transfer bozorida muzokaralarga ochiq ekani, ammo bunday jarayonlar axloqiy va professional tarzda, klublar o‘rtasidagi o‘zaro hurmat asosida amalga oshirilishi kerakligi ta’kidlangan.

Madridliklar fikricha, «Barselona» mazkur talablarga amal qilmagan. Shu sababli klub Xulian Alvares transferi bo‘yicha kataloniyaliklar bilan hech qanday muzokara o‘tkazilmaganini va kelajakda ham o‘tkazilmasligini ma’lum qildi. «Atletiko» rahbariyati futbolchi klub qarorini tushunib, jamoa maqsadlariga erishish uchun ishlashda davom etishiga ishonch bildirgan.

Bu bayonot «Barselona» prezidenti Joan Laporta Alvaresga qiziqish saqlanib qolayotgani va klubning taklifi transfer oynasi yopilguniga qadar amal qilishini aytganidan keyin e’lon qilindi. «Atletiko» bosh ijrochi direktori Migel Anxel Xil Marin esa avvalroq klub futbolchini hatto 200 million yevro evaziga ham sotish niyatida emasligini bildirgan edi.