«Атлетико» Хулиан Альвареснинг «Барселона»га эҳтимолий трансфери бўйича қатъий позициясини расман маълум қилди. Клуб директорлар кенгаши аргентиналик ҳужумчининг каталонияликлар сафига ўтиши юзасидан музокара олиб бормаслик қарорини бир овоздан қўллаб-қувватлади.

«Атлетико» баёнотида клуб трансфер бозорида музокараларга очиқ экани, аммо бундай жараёнлар ахлоқий ва профессионал тарзда, клублар ўртасидаги ўзаро ҳурмат асосида амалга оширилиши кераклиги таъкидланган.

Мадридликлар фикрича, «Барселона» мазкур талабларга амал қилмаган. Шу сабабли клуб Хулиан Альварес трансфери бўйича каталонияликлар билан ҳеч қандай музокара ўтказилмаганини ва келажакда ҳам ўтказилмаслигини маълум қилди. «Атлетико» раҳбарияти футболчи клуб қарорини тушуниб, жамоа мақсадларига эришиш учун ишлашда давом этишига ишонч билдирган.

Бу баёнот «Барселона» президенти Жоан Лапорта Альваресга қизиқиш сақланиб қолаётгани ва клубнинг таклифи трансфер ойнаси ёпилгунига қадар амал қилишини айтганидан кейин эълон қилинди. «Атлетико» бош ижрочи директори Мигель Анхель Хиль Марин эса аввалроқ клуб футболчини ҳатто 200 миллион евро эвазига ҳам сотиш ниятида эмаслигини билдирган эди.