«Liverpul»ning sobiq hujumchisi, hozirda Qatarning «As-Sadd» klubi futbolchisi bo‘lgan Roberto Firmino faoliyatini yakunlaganidan so‘ng mersisaydliklar afsonalari ishtirokidagi o‘yinda maydonga tushishni istashini aytdi.

«Tan olishim kerak, yildan-yilga mavsumoldi tayyorgarliklar tobora qiyin kechmoqda. Ammo har safar maydonga chiqqanimda hanuz o‘sha hayajonni his qilaman. O‘zimni juda baxtli his qilyapman. Qo‘limdan kelganicha uzoqroq o‘ynashni xohlayman. Sog‘lom bo‘lib, jamoaga foyda keltira olar ekanman, davom etmoqchiman. Nega yana besh yil o‘ynab, 40 yoshimda faoliyatimni yakunlamasligim kerak?

Qachondir albatta “Enfild”ga qaytaman — bu o‘ziga xos joy. Men qaytib, xayrli ishlar uchun o‘tkaziladigan uchrashuvlardan birida klub afsonalari safida o‘ynashni istardim. Agar meni chaqirishsa — o‘ynayman.

“Liverpul”ni tark etganimga uch yil bo‘ldi, ammo hanuz jamoaning barcha o‘yinlarini ko‘rishga harakat qilaman. Bu klub men va oilam uchun juda katta ahamiyatga ega. Muxlislar bizga doimo ajoyib munosabatda bo‘lishgan. Bizda juda ko‘p ajoyib xotiralar bor. Klub uchun urgan barcha gollarim, qo‘lga kiritilgan sovrinlar va shahar paradlari bizga juda ko‘p quvonch bag‘ishlagan. U yerda shuncha uzoq vaqt o‘ynash imkoniyati — Xudoning sovg‘asi. Erishgan yutuqlarimizdan faxrlanaman», — deya Firminoning so‘zlarini The Athletic keltirmoqda.