"Al-Hilol" "Arsenal" hujumchisi Gabriel Martinelli transferi bo‘yicha London klubi bilan kelishuvga erishdi.
Taniqli insayder Fabrisio Romano ma’lumotiga ko‘ra, bonuslar bilan birga bitim qiymati 65 million yevrodan oshadi. Braziliyalik futbolchiga yaqin 24 soat ichida transferni yakunlash uchun yo‘lga chiqishga ruxsat berilgan.
Martinelli Saudiya Arabistoni klubi bilan uzoq muddatli shartnoma imzolaydi.
25 yoshli vinger 2019 yildan buyon "Arsenal" sharafini himoya qilib kelmoqda. U Angliya klubiga Braziliyaning "Ituano" jamoasidan ko‘chib o‘tgan edi.
Martinelli "Arsenal" safida jami 278 ta uchrashuv o‘tkazib, 62 ta gol urgan va 36 ta golli uzatmani amalga oshirgan.
