«Komo» UEFAdan Chempionlar ligasidagi uy uchrashuvlarini «Juzeppe Sinigalya» stadionida o‘tkazish uchun ruxsat oldi. Bu haqda Daily Mail xabar berdi.

A Seriya klubi avvalroq stadion infratuzilmasi UEFA talablariga javob bermagani sababli yevrokubokdagi uy o‘yinlarini boshqa maydonda o‘tkazish xavfiga duch kelgan edi.

Sesk Fabregas boshchiligida o‘tgan mavsum A Seriyada 4-o‘rinni egallab, Chempionlar ligasi yo‘llanmasini qo‘lga kiritgan «Komo» shundan so‘ng darhol keng ko‘lamli ta’mirlash ishlarini boshladi. Rekonstruksiya ishlari uch oy davom etdi.

Loyiha doirasida darvozalardan biri ortidagi vaqtinchalik tribuna buzilib, uning o‘rniga yangi beton konstruksiya barpo etildi. Maydon qoplamasi to‘liq yangilanib, uning uzunligi 2,5 metrga kengaytirildi.

Shuningdek, futbolchilar tonneli va zaxira o‘rindiqlari boshqa joyga ko‘chirildi. Kiyinish xonalari va OAV uchun infratuzilma ham modernizasiya qilindi. Yangi mikst-zona, telestudiya va matbuot anjumani zali tashkil etildi.

Mahalliy kollej bilan kelishuv asosida stadion atrofida yana 150 ta avtomobil uchun to‘xtash joyi ham yaratildi.

UEFA ruxsatidan so‘ng «Komo» Chempionlar ligasidagi raqiblarini o‘z maydonida qabul qila oladi. Ular orasida «Manchester Yunayted», «Pari Sen-Jermen», «RB Leypsig» va «AYEK Afina» bor.