«Shtutgart» 19 yoshli qanot hujumchisi Lazar Yovanovichning «Udineze»ga doimiy ravishda o‘tganini rasman tasdiqladi.

Serbiyalik futbolchi Germaniya klubiga o‘tgan yili «Srvena Zvezda»dan kelgan edi. U «Shtutgart» safida barcha musobaqalarda atigi oltita o‘yinda maydonga tushdi. Klub sport direktori Fabian Volgemut jamoadagi raqobat yuqori ekani Yovanovichning ketishiga sabab bo‘lganini aytdi.

Uning fikricha, «Udineze»ga o‘tish futbolchiga ko‘proq o‘yin amaliyotiga ega bo‘lish imkonini beradi. Tomonlar transfer summasi haqida ma’lumot bermagan.