«Betis» vingeri Antoni 2026 yilgi jahon chempionatida ishtirok etishni juda xohlaganini, biroq Braziliya terma jamoasi murabbiylar shtabining qaroriga xotirjam munosabatda bo‘lganini aytdi.
«Ikkinchi jahon chempionatimda o‘ynashni orzu qilgandim, ammo bu ham futbolning bir qismi. Albatta, Braziliyaning Norvegiyaga mag‘lub bo‘lganini ko‘rish menga og‘ir botdi. O‘sha paytda uyda edim, jamoaga muxlislik qildim va u yerda bo‘lib, qandaydir yordam berishni juda istadim. Ammo bu — futbol.
Eng muhimi — o‘z ishingni qilish. Natija esa keyin keladi. Men doim nazoratimda bo‘lgan ishlarga e’tibor qaratishim kerakligini yodda tutaman. Menga bog‘liq bo‘lmagan, boshqa insonlar qaror qiladigan narsalar bor va ular haqida ortiqcha qayg‘urishim shart emas.
Men o‘z ishimni qilishim va terma jamoaga qaytish uchun mehnat qilishda davom etishim kerak. Braziliya terma jamoasi libosini kiyish — alohida tuyg‘u», — dedi Antoni Transfermarkt nashriga bergan intervyusida.
26 yoshli Antoni Braziliya terma jamoasi safidagi so‘nggi o‘yinini 2023 yilda o‘tkazgan. U milliy jamoa tarkibida jami 16 ta uchrashuvda maydonga tushib, 2 ta gol urgan.
