«Бетис» вингери Антони 2026 йилги жаҳон чемпионатида иштирок этишни жуда хоҳлаганини, бироқ Бразилия терма жамоаси мураббийлар штабининг қарорига хотиржам муносабатда бўлганини айтди.

«Иккинчи жаҳон чемпионатимда ўйнашни орзу қилгандим, аммо бу ҳам футболнинг бир қисми. Албатта, Бразилиянинг Норвегияга мағлуб бўлганини кўриш менга оғир ботди. Ўша пайтда уйда эдим, жамоага мухлислик қилдим ва у ерда бўлиб, қандайдир ёрдам беришни жуда истадим. Аммо бу — футбол.

Энг муҳими — ўз ишингни қилиш. Натижа эса кейин келади. Мен доим назоратимда бўлган ишларга эътибор қаратишим кераклигини ёдда тутаман. Менга боғлиқ бўлмаган, бошқа инсонлар қарор қиладиган нарсалар бор ва улар ҳақида ортиқча қайғуришим шарт эмас.

Мен ўз ишимни қилишим ва терма жамоага қайтиш учун меҳнат қилишда давом этишим керак. Бразилия терма жамоаси либосини кийиш — алоҳида туйғу», — деди Антони Transfermarkt нашрига берган интервьюсида.

26 ёшли Антони Бразилия терма жамоаси сафидаги сўнгги ўйинини 2023 йилда ўтказган. У миллий жамоа таркибида жами 16 та учрашувда майдонга тушиб, 2 та гол урган.