Lionel Messi Ispaniyaning «Eldense» futbol klubi egasiga aylanishi mumkin.
As nashri ma’lumotiga ko‘ra, argentinalik yulduzning huquqshunoslari Xuan Karlos Truxilyo boshchiligidagi Kolumbiyaning TH investisiya guruhi bilan ma’lum vaqtdan buyon muzokara olib borgan. Tomonlar bugun prinsipial kelishuvga erishgan.
Unga ko‘ra, jahon futboli tarixida eng ko‘p sovrin qo‘lga kiritgan futbolchilardan biri bo‘lgan Messi Ispaniya ikkinchi divizionida ishtirok etuvchi «Eldense» klubining majoritar aksiyadoriga aylanadi.
Biroq bitimning yakuniy rasmiylashtirilishi Ispaniya Oliy sport kengashi (CSD) ruxsat berishiga bog‘liq bo‘ladi.
Qayd etilishicha, Messi mazkur loyihada yagona investor sifatida ishtirok etmoqda. Bitimga boshqa biznes hamkorlar yoki sobiq futbolchilar jalb qilinmagan.
Tomonlar kelishuv haqida yaqin kunlarda rasman e’lon qilishni rejalashtirgan. Agar bitim amalga oshsa, Lionel Messi Ispaniyada professional futbol klubiga egalik qilgan birinchi argentinalikka aylanadi.
