Hujumchi Andrea Belotti Italiya chempionatida 350 dan ortiq o‘yin o‘tkazgan. Biroq «Roma»ning sobiq futbolchisi o‘z mamlakati oliy divizionida jamoa topa olmadi. Yozda Belotti tibbiy ko‘rikdan o‘ta olmagani sabab «Kalyari»da qolmagani haqida xabarlar tarqalgan edi.
Endi 32 yoshli Belotti «Modena» futbolchisiga aylandi. Seriya B klubi o‘zining rasmiy saytida Andrea bilan 2027 yil o‘rtalariga qadar, bir mavsumlik shartnoma imzolanganini ma’lum qildi. Belotti «Modena»da 11-raqamda o‘ynaydi.
Hozirda «Modena» Italiyaning ikkinchi darajali futbol divizioni turnir jadvalida beshinchi o‘rinni bo‘lishib turibdi. Chempionatning o‘tgan uch turida jamoa olti ochko to‘pladi.
Andrea Belotti 2021 yilda Italiya terma jamoasi tarkibida Yevropa chempioni bo‘lgan.
