«Real» yarim himoyachisi Jud Bellingem Chempionlar ligasi guruh bosqichida «Inter» ustidan qozonilgan 2:1 hisobidagi g‘alabadan so‘ng fikr bildirdi.

«Juda kuchli jamoaga qarshi o‘yinda bizga qiyin bo‘lgan vaziyatlar ham bo‘ldi. Ular bekorga Italiya chempioni bo‘lishmagan.

Shu bilan birga, ayrim paytlarda biz ularni qiyin ahvolga solib qo‘ydik — ayniqsa, to‘p bilan yaxshi harakat qilgan holda qarshi hujumlarda. «Betis»ga qarshi o‘yinda ham shunga o‘xshash holat bo‘lgan, o‘sha bahsda o‘z imkoniyatlarimizni golga aylantira olmagan edik.

O‘yin yirikroq hisobda yakunlanishi mumkin edi. Bizda, jumladan menda ham, imkoniyatlar bo‘ldi. Ammo Chempionlar ligasida bosimga bardosh berishga to‘g‘ri keladigan vaziyatlar bo‘lishi tabiiy.

Biz faqat bitta gol o‘tkazib yubordik, himoyachilar juda yaxshi harakat qilishdi, ammo kuchli jamoalar himoyadagi bo‘shliqlarni topa oladi.

Bundan tashqari, Tibo Kurtua ajoyib o‘yin ko‘rsatdi. Hammasi ham yomon bo‘lmadi, ammo ishlashimiz kerak bo‘lgan jihatlar bor. Eng muhimi — uch ochko», — dedi Jud Bellingem.