«Liverpul» darvozaboni Alisson Bekker «Nottingem Forest»ga qarshi Premyer-liga uchrashuvidan keyingi xatti-harakatlari uchun Angliya futbol assosiasiyasi (FA) tomonidan 8 ming funt sterling jarimaga tortildi.

Uchrashuv 2:2 hisobida yakunlangan bo‘lib, bahs davomida Alisson hakam bilan bahslashgani uchun ogohlantirilgandi. Voqeaga jamoaning bir vaqtning o‘zida uch nafar futbolchini almashtirish rejasi sabab bo‘lgan.

To‘rtinchi hakam almashtirish tablosini tayyorlashni kechiktirgach, «Forest» tezkor to‘p tashlashdan foydalanib, hujumni davom ettirgan va Alisson Niko Uilyamsni yiqitgan. Natijada «Nottingem Forest» penaltidan foydalanib, hisobni 2:1 ko‘rinishiga keltirgan.
Uchrashuvdan so‘ng asabiylashgan Alisson tunnel yonida turgan elektron almashtirish tablosini tepgan va unga zarar yetkazgan. FA braziliyalik darvozabonning bu harakatini nomunosib xulq-atvor deb baholadi. Alisson ayblovni tan olgan va unga belgilangan 8 ming funt jarima qo‘llangan.