2026/27 yilgi Chempionlar ligasi umumiy bosqichi 1-turidan o‘rin olgan uchrashuvda Chexiyaning «Slaviya» klubi Fransiyaning «Lans» jamoasiga mag‘lub bo‘ldi.
Pragadagi «Fortuna Arena» stadionida o‘tgan bahsda mehmonlar 3:2 hisobida irodali g‘alabaga erishdi. Uchrashuvni grek hakami Vasilis Fotias boshqarib bordi.
49-daqiqada «Slaviya» himoyachisi Mikulash Konechni qizil kartochka oldi va chexlar uchrashuvni bir kishi kam bo‘lib davom ettirdi.
Shunga qaramay, 51-daqiqada mezbonlar yarim himoyachisi Daniel Shturm hisobni ochdi. 73-daqiqada «Lans» hujumchisi Abdalla Sima hisobni tenglashtirdi.
88-daqiqada Shturm ikkinchi golini urib, «Slaviya»ni yana oldinga olib chiqdi. Biroq uchrashuv yakunida mehmonlar qalbovar qilmas tarzda g‘alabani ilib ketdi. 90+1-daqiqada fransuz Floryan Toven hisobni 2:2 qildi, 90+3-daqiqada esa Ruben Agilar «Lans»ga g‘alaba keltirgan golni urdi.
Chempionlar ligasi umumiy bosqichi 2-turida «Slaviya» 13 oktyabr kuni safarda Ozarbayjonning «Sabah» klubiga qarshi o‘ynaydi. Shu kuni «Lans» o‘z maydonida Portugaliyaning «Sporting» jamoasini qabul qiladi.
Chempionlar ligasi. Umumiy bosqich, 1-tur
10 sentyabr 2026 yil. Praga, «Fortuna Arena»
«Slaviya» — «Lans» — 2:3
Gollar: Daniel Shturm, 51 (1:0), Abdalla Sima, 73 (1:1), Daniel Shturm, 88 (2:1), Floryan Toven, 90+1 (2:2), Ruben Agilar, 90+3 (2:3)
Qizil kartochka: Mikulash Konechni («Slaviya»), 49.
Bosh hakam: Vasilis Fotias (Gresiya).
