«Al-Xolidiya» bosh murabbiyi Goran Tomich jamoaning Osiyo Chempionlar ligasi 2 musobaqasi guruh bosqichi 1-turida «Nasaf»ga qarshi o‘yin oldidan o‘z fikrlarini bildirdi.
Xorvatiyalik mutaxassis 15 sentyabr kuni Bahrayn milliy stadionida o‘tkazilgan matbuot anjumanida jamoasi bahsga yaxshi tayyorgarlik ko‘rganini ta’kidladi.
«Jamoa yaxshi holatda. Mavsumdagi dastlabki uchta o‘yinimizda munosib darajada harakat qildik va bu uchrashuvlar Osiyo musobaqasiga tayyorgarlik nuqtai nazaridan ham bizga yordam berdi», — dedi Tomich.
«Al-Xolidiya» Osiyo Chempionlar ligasi 2ning A guruhida «Nasaf», «Al-Vahda» va «Kuvayt SK» bilan birga bahs olib boradi. Tomich guruhda kuchli raqiblar jamlanganini tan olgan holda, bu holat jamoaning maqsadlariga ta’sir qilmasligini aytdi.
«Guruhimizda kuchli jamoalar bor. Ammo biz o‘zimizni boshqa raqiblardan kam deb hisoblamaymiz. Har bir uchrashuvda raqobatlashishga harakat qilamiz», — dedi murabbiy.
Tomichning ta’kidlashicha, «Al-Xolidiya» musobaqada uzoqroq yo‘l bosib o‘tishni maqsad qilgan.
«Maqsadimiz — har bir o‘yinda raqobatlashish va yakunda pley-off bosqichiga chiqish», — dedi u.
«Al-Xolidiya» ichki chempionatda ham mavsumni muvaffaqiyatli boshlagan. Jamoa Nosir bin Hamad Premyer-ligasining dastlabki uchta uchrashuvida 2 ta g‘alaba va 1 ta durang qayd etgan. Shu jumladan, «Al-Najma»ni 7:2 hisobida mag‘lub etgan va «Aali»ni 3:1 hisobida yenggan. So‘nggi turda esa «Al-Riffa» bilan 0:0 o‘ynagan.
Bahraynlik futbolchilar ham «Nasaf»ga qarshi bahsning murakkab bo‘lishini tan olishmoqda. «Al-Xolidiya» futbolchisi Nizor al-Usmoniyning aytishicha, jamoa O‘zbekiston klubiga qarshi bahsning qiyinligini yaxshi tushunadi, ammo uch ochkoni qo‘lga kiritish uchun maydonga chiqadi.
«Barcha futbolchilar o‘yinga tayyor. Birinchi uchrashuvda uch ochko olishni istaymiz. Barcha kuchimizni maydonda qoldirishga tayyormiz», — dedi u.
«Al-Xolidiya» — «Nasaf» uchrashuvi 16 sentyabr kuni Bahrayn milliy stadionida bo‘lib o‘tadi.
Osiyo Chempionlar ligasi 2 | 2026/27 | 1-tur
«Al-Xolidiya» — «Nasaf»
16 sentyabr, Bahrayn milliy stadioni.
