«Manchester Yunayted» Angliya Liga kubogi 3-bosqichida «Brayton»ga qarshi o‘yin oldidan bir qator jarohatlangan futbolchilariga tayana olmaydi. Bu haqda Manchester Evening News xabar berdi.
Karlos Baleba mavsumoldi tayyorgarligi paytida olgan to‘piq jarohatidan tiklanishda davom etmoqda. Bosh murabbiy Maykl Karrik avvalroq yarim himoyachining qaytishi uchun yana bir necha hafta kerak bo‘lishini aytgan edi. Uning sentyabr yoki oktyabr oyida safga qaytishi kutilmoqda.
Amad Diallo ham mavsumoldi davrida jarohat olgan. Karrikning aytishicha, kot-d’ivuarlik futbolchi oktyabrdan oldin maydonga qayta olmaydi.
Matteys de Ligt o‘tgan yilning noyabridan beri bel jarohati sabab o‘ynamayotgan edi. U hozir mashg‘ulotlarga qaytgan, ammo «Manchester Yunayted» uning tiklanish jarayonini shoshirtirmoqchi emas. Himoyachining oktyabr yoki noyabrda safga qaytishi kutilmoqda.
Lyuk Shou jarohat sabab so‘nggi ikki o‘yinni o‘tkazib yubordi. Karrik uning hali to‘liq tayyor emasligini, ammo qaytishga yaqin turganini aytgan. Shou sentyabr oxirida maydonga tushishi mumkin.
Manuel Ugarte Jahon chempionatida olgan jiddiy tizza jarohatidan tiklanmoqda. Uning qachon safga qaytishi hozircha noma’lum.
Darvozabon Tom Xiton esa mashg‘ulot paytida son orqa qismi mushaklaridan jarohat oldi. Uning tiklanish muddati ham hozircha aniq emas.
