OKMK klubi bosh murabbiyi Mirjalol Qosimov O‘zbekiston kubogining nimchorak final bosqichi doirasida bo‘lib o‘tgan "Xorazm"ga qarshi o‘yin borasida o‘z fikrlarini bildirib o‘tdi.

— O‘yin haqida fikringiz?

— Ikki jamoa ham g‘alaba uchun harakat qildi. O‘z imkoniyatlarimizdan foydalanib, keyingi bosqichga chiqdik. Kubok bahslari bitta o‘yindan iborat bo‘lgani uchun yarimta vaziyatni ham golga aylantirishga to‘g‘ri keladi. Kecha ko‘rdik, «Andijon» jamoasi 2:0 hisobida oldinda bora turib, uchrashuv 2:2 hisobida tugadi va «Andijon» penaltilar seriyasida g‘alaba qozondi.

Bugun «Xorazm» jamoasi ham jangovor o‘yin ko‘rsatdi, oxirigacha kurash olib bordi. Qiziqarli o‘yin bo‘ldi, deb hisoblayman. Keyingi bosqichga chiqqanimizdan xursandman. Endi chempionatning navbatdagi turiga hozirlik ko‘ramiz. Stadionga kelgan muxlislarga ham o‘z minnatdorchiligimizni bildiramiz.

— O‘yinga bir kun qolganida «Xorazm»ga yangi murabbiy tayinlandi. Bu sizning tayyorgarligingizga qanday ta’sir qildi?

— Albatta, o‘yindan oldin har bir detalni inobatga olamiz. Raqib safida bugun ayrim yetakchilar o‘ynamadi va boshqalar o‘zini ko‘rsatishga harakat qildi. Bu, o‘z navbatida, boshqa futbolchilarga imkoniyat beradi. Bugun Kubokka xos bo‘lgan dramatik o‘yin guvohi bo‘ldik.