ОКМК клуби бош мураббийи Миржалол Қосимов Ўзбекистон кубогининг нимчорак финал босқичи доирасида бўлиб ўтган "Хоразм"га қарши ўйин борасида ўз фикрларини билдириб ўтди.

— Ўйин ҳақида фикрингиз?

— Икки жамоа ҳам ғалаба учун ҳаракат қилди. Ўз имкониятларимиздан фойдаланиб, кейинги босқичга чиқдик. Кубок баҳслари битта ўйиндан иборат бўлгани учун яримта вазиятни ҳам голга айлантиришга тўғри келади. Кеча кўрдик, «Андижон» жамоаси 2:0 ҳисобида олдинда бора туриб, учрашув 2:2 ҳисобида тугади ва «Андижон» пенальтилар сериясида ғалаба қозонди.

Бугун «Хоразм» жамоаси ҳам жанговор ўйин кўрсатди, охиригача кураш олиб борди. Қизиқарли ўйин бўлди, деб ҳисоблайман. Кейинги босқичга чиққанимиздан хурсандман. Энди чемпионатнинг навбатдаги турига ҳозирлик кўрамиз. Стадионга келган мухлисларга ҳам ўз миннатдорчилигимизни билдирамиз.

— Ўйинга бир кун қолганида «Хоразм»га янги мураббий тайинланди. Бу сизнинг тайёргарлигингизга қандай таъсир қилди?

— Албатта, ўйиндан олдин ҳар бир детални инобатга оламиз. Рақиб сафида бугун айрим етакчилар ўйнамади ва бошқалар ўзини кўрсатишга ҳаракат қилди. Бу, ўз навбатида, бошқа футболчиларга имконият беради. Бугун Кубокка хос бўлган драматик ўйин гувоҳи бўлдик.