Yaponiyaning Aichi-Nagoya shahrida bo‘lib o‘tadigan XX Yozgi Osiyo o‘yinlarida sport gimnastikasi bo‘yicha O‘zbekiston sharafini qaysi sportchilar himoya qilishi ma’lum bo‘ldi.
E’tiborli jihati shundaki, jamoa tarkibidan o‘zbek sportining tirik afsonasi, 51 yoshli Oksana Chusovitina ham joy olgan. Jahon gimnastikasi tarixida o‘ziga xos iz qoldirgan va hamon yuqori saviyada harakat qilib kelayotgan tajribali sportchi Yaponiyadagi musobaqada ham mamlakat sharafini himoya qiladi.
Shuningdek, qit’a birinchiligida ishtirok etadigan O‘zbekiston terma jamoasi safidan Aleksandra Shevchenko hamda Dildora Aripova kabi gimnastikachilar ham o‘rin olgan. Sportchilar ushbu turnirga murabbiylar — Elvira Rakova va Andrey Markelov qo‘l ostida tayyorgarlik ko‘rmoqda.
O‘zbekiston terma jamoasi tarkibi:
Oksana Chusovitina
Aleksandra Shevchenko
Dildora Aripova
Murabbiylar shtabi:
Elvira Rakova
Andrey Markelov
Ma’lumot uchun, XX Osiyo o‘yinlari 19 sentyabrdan 4 oktyabrgacha Yaponiyaning Aichi-Nagoya shahrida bo‘lib o‘tadi. Musobaqaning rasmiy ochilish marosimi 19 sentyabr, shanba kuniga belgilangan bo‘lsa-da, futbol, basketbol va voleybol kabi jamoaviy sport turlari bo‘yicha bahslar allaqachon boshlanib ketgan. Turnirda Osiyo olimpiya kengashiga a’zo 45 ta Milliy olimpiya qo‘mitasidan sportchilar va rasmiy delegasiyalar ishtirok etishi kutilmoqda. Turnida 43 ta sport turining 70 ta yo‘nalishida 468 ta medallar jamlanmasi o‘ynaladi. 5-Paraosiyo o‘yinlari esa 18-24 oktyabr kunlari Aichi-Nagoya shahrida o‘tkaziladi.
