«Brentford» bosh murabbiyi Kit Endryus Angliya chempionatining 5-turida «Chelsi» ustidan qozonilgan 3:0 hisobidagi g‘alabaga izoh berdi.

«Go‘yo bu o‘yinda o‘zim ham maydonga tushgandek his qildim. Bu haqiqatan ham ajoyib kecha bo‘ldi. Bunday lahzalardan zavqlanish muhim, chunki biz juda ko‘p mehnat qilamiz va bu ishda og‘ir kunlar ham ko‘p bo‘ladi. G‘arbiy Londondan bo‘lgan raqibga qarshi o‘ynaganda, uchrashuvga tayyorgarlik ko‘rib, jamoa bilan birga butun jarayonni bosib o‘tar ekansiz, doimo qandaydir qiyinchiliklarga duch kelasiz. Ammo biz juda yaxshi holatda edik va bugun mehnatimiz natija berganini ko‘rish yoqimli.

Albatta, ikkinchi gol hal qiluvchi ahamiyat kasb etdi. Birinchi golni standart vaziyatdan urdik. Menimcha, o‘yin uslubimiz tufayli biz oldindan taxmin qilib bo‘lmaydigan jamoamiz va turli usullarda gol urib, vaziyatlar yarata olamiz. O‘yinni nazorat qilib, to‘pga egalik qilganimizda golli vaziyatlar yaratish va raqib harakatlarida tartibsizlik keltirib chiqarishga qodirmiz. Ammo ayrim vaziyatlarda chuqur himoyalanganimizda ham tezkor hujumlarda juda xavfli bo‘la olamiz. Jamoamizning o‘yinida menga ko‘p narsa yoqyapti.

Menimcha, «Chelsi» o‘yinga juda puxta yondashdi. Ular bizning kuchli jihatlarimizga katta e’tibor qaratdi. Igor Tiagu — shunday jihatlarimizdan biri. Birinchi bo‘limda unga ba’zida bo‘sh hudud topish qiyin bo‘ldi. Bunday paytda sabrli bo‘lish va hamma ishni to‘g‘ri bajarish kerak. Futbolchilarimizning odatlari, klub va jamoamizdagi qadriyatlar tufayli bu sifatlar maydonda muntazam namoyon bo‘lyapti. Endi esa bu jamoa sifatida qay darajaga chiqqanimizda ham ko‘rina boshladi.

Biz mavsumni yaxshi boshladik. Raqobatbardosh bo‘ldik, mavsumning dastlabki haftalarida bor kuchimizni berishimiz va turli sifatlarni namoyish etishimizga to‘g‘ri keldi. Bu ligada aynan shu narsa doimo talab qilinadi. Endi futbolchilar turli tomonlarga tarqalayotgan bir paytda, dastlabki bir necha hafta qanday o‘tganini biroz tahlil qilib olish imkoniyatiga egamiz», — dedi Endryus.