Braziliyalik vinger Rafinya "Barselona" bilan yangi mehnat shartnomasi imzolash bo‘yicha muzokara olib bormoqda. Bu haqda jurnalist Ekrem Konur ijtimoiy tarmoqlarda xabar berdi.

Manba ma’lumotiga ko‘ra, yulduz futbolchi "ko‘k-anorranglilar"dan maoshini ikki barobar oshirishni talab qilgan. Rafinya klubning eng ko‘p maosh oladigan futbolchisiga aylanishni istamoqda.

Hozircha "Barselona" rahbariyatining bu talabga qanday javob berishi ma’lum emas.

29 yoshli futbolchining kataloniyaliklar bilan amaldagi shartnomasi 2028 yil iyun oyi oxiriga qadar mo‘ljallangan. Uning bozor qiymati 70 million yevroni tashkil etadi.

Joriy mavsumda Rafinya La Ligada oltita uchrashuvda 9 ta gol urdi va 3 ta golli uzatmani amalga oshirdi.