«Barselona» yarim himoyachisi Rodri Ernandes «Sevilya»ga qarshi o‘yinning birinchi bo‘limi jamoa uchun muhim saboq bo‘lganini aytdi.

Jamoalar tanaffusga 1:1 hisobida chiqib ketdi. 19-daqiqada Yussuf Fofana mezbonlarni oldinga olib chiqqan bo‘lsa, 22-daqiqada Rafinya hisobni tenglashtirdi. Tanaffusdan keyin braziliyalik futbolchi yana ikki bor gol urib, «ko‘k-anorranglilar»ga 3:1 hisobidagi g‘alabani keltirdi.

«Menimcha, bu o‘yinda biz juda muhim bir saboq oldik. Nega bir xil xatoni qayta-qayta takrorlash kerak? Ba’zan to‘p bilan xotirjamroq harakat qilish lozim. Bugungi o‘yinda bizga aynan shu narsa — to‘p nazorati va ishonchli paslar kerak edi. Birinchi bo‘limda juda ko‘p keraksiz to‘p yo‘qotishlarga yo‘l qo‘ydik.

«Sevilya» bizga qarshi qanday o‘ynashni juda yaxshi bilardi va birinchi bo‘limda qarshi hujumlarda tez-tez oldinga chiqdi. Ba’zan aqlliroq o‘ynash, ortiqcha tavakkal qilmaslik kerak», — dedi Rodri uchrashuvdan keyingi intervyuda.

«Barselona» xalqaro tanaffusga Ispaniya chempionati peshqadami sifatida yo‘l olmoqda. Kataloniyaliklar yetti turdan keyin 21 ochko jamg‘argan.