UYEFA bir necha kun oldin «Real»dan «Negreyra ishi» bo‘yicha hujjatlar olganini tasdiqladi. Mazkur ish «Barselona»ning hakamlar texnik qo‘mitasining sobiq vise-prezidenti Joze Mariya Enrikes Negreyraga qilgan to‘lovlari bilan bog‘liq.
UYEFA ushbu hujjatlarni davom etayotgan tergov doirasida inobatga olishini ma’lum qilgan.
OK Diario xabar berishicha, «Real» UYEFAdan ish bo‘yicha imkon qadar tezroq qaror qabul qilishni so‘ragan.
Biroq Madrid klubiga javoban UYEFA xotirjamlik va sabr saqlashga chaqirgan. Tergov qancha vaqt talab qilsa, shuncha davom etadi.
Avvalroq «Real» UYEFAga «Negreyra ishi»ga oid 50 mingdan ortiq sahifa va videolardan iborat hujjatlarni taqdim etgani haqida xabar berilgan edi.
