Madridning «Real» klubi Ispaniya chempionatida «Vilyarreal» ustidan 1:0 hisobida g‘alaba qozonganiga qaramay, jamoa atrofidagi vaziyat xavotir uyg‘otmoqda.
MARCA nashrining xabar berishicha, futbolchilarning maydondagi asabiy harakatlari va murabbiylar shtabi ishtirokidagi tortishuvlar bosh murabbiy Joze Mourinyo uchun jiddiy muammoga aylanishi mumkin.
«Santyago Bernabeu» stadionida o‘tgan uchrashuvda Vinisius Juniorning maydondan chetlatilishi, Mourinyoning hakam qarorlariga e’tirozlari hamda har ikki jamoa zaxira o‘rindig‘i vakillari o‘rtasidagi tortishuvlar vaziyatni yanada keskinlashtirdi.
Bahs davomida «Real» futbolchilari jami oltita sariq va bitta qizil kartochka oldi.
Manbaga ko‘ra, portugaliyalik mutaxassis jamoada kuchayib borayotgan norozilik va asabiylik futbolchilarning diqqatini asosiy vazifalardan chalg‘itishini istamaydi.
Mourinyo bahsli vaziyatlarga boy o‘tgan uchrashuvdan keyingi matbuot anjumanida ham ishtirok etishdan bosh tortdi.
Shunga qaramay, «Real» muhim uch ochkoni qo‘lga kiritishga muvaffaq bo‘ldi. Uchrashuv taqdirini Yan Diomande tomonidan kiritilgan yagona gol hal qildi.
Biroq maydondagi intizomiy muammolar va keskin muhit Madrid klubi murabbiylar shtabi oldiga qo‘shimcha vazifalarni qo‘ymoqda.
