France Football nashri "Oltin to‘p" sovrini uchun ovoz berish natijalarini taqdirlash marosimiga qadar sir saqlash niyatida.
Bu haqda The Touchline xabar bermoqda.
Manba ma’lumotiga ko‘ra, tashkilotchilar g‘olibning ismi taqdirlash marosimida konvert ochilguniga qadar oshkor bo‘lmasligi uchun barcha zarur choralarni ko‘rishni rejalashtirmoqda.
Qayd etilishicha, France Football avvalgi tartibni saqlab qolmoqchi. Unga ko‘ra, ovoz berishda g‘olib chiqqan futbolchining shaxsi sahnada rasman e’lon qilinmaguncha sir tutiladi.
Hatto sovrinni qo‘lga kiritgan futbolchining o‘zi ham natijadan oldindan xabardor qilinmaydi. U g‘alabasi haqida faqat taqdirlash marosimida konvert ochilganidan so‘ng bilib oladi.
Eslatib o‘tamiz, ayni paytda "Oltin to‘p" sovrinining amaldagi sohibi Fransiya terma jamoasi va "Pari Sen-Jermen" hujumchisi Usmon Dembele hisoblanadi.
2025/2026 yilgi mavsum yakunlariga ko‘ra eng yaxshi futbolchini taqdirlash marosimi 26 oktyabr kuni London shahrida bo‘lib o‘tishi rejalashtirilgan.
