Londonning "Chelsi" klubi qanot himoyachisi Malo Gyusto faoliyatini Fransiyaning "Pari Sen-Jermen" jamoasida davom ettirishi mumkin.

Bu haqda transferlar bo‘yicha insayder Ekrem Konur xabar bermoqda.

Manba ma’lumotiga ko‘ra, parijliklar 23 yoshli fransuz futbolchisiga bo‘lgan qiziqishini qayta tiklashni rejalashtirmoqda. "PSJ" rahbariyati himoya chizig‘ida taktik imkoniyatlarni kengaytirish va zaxira tarkibini kuchaytirishni maqsad qilgan.

Qayd etilishicha, "Chelsi" endi Gyustoni sotilmaydigan futbolchilar qatoriga kiritmayapti. London klubi himoyachi bo‘yicha uning bozor qiymatiga mos takliflarni ko‘rib chiqishga tayyor.

Shuningdek, "ko‘klar" Gyustoni o‘tgan yozda talab qilgan 90 million yevrodan arzonroq narxga sotishi mumkinligi aytilmoqda.

Joriy mavsumda fransuz himoyachisi barcha musobaqalar doirasida yettita uchrashuvda maydonga tushib, bitta golli uzatmani amalga oshirdi.

Hozircha klublar o‘rtasida rasmiy muzokaralar boshlangani yoki "PSJ" tomonidan aniq taklif yuborilgani haqida ma’lumot yo‘q.